“Azərbaycan yeni inkişaf mərhələsində: perspektiv, hədəf və istiqamətlər”

   Heydər Əliyev Mərkəzində Azərbaycan Respublikasının Prezidenti yanında Dövlət İdarəçilik Akademiyası və Qaradağ Rayon İcra Hakimiyyətinin birgə təşkil etdiyi  “Azərbaycan yeni inkişaf mərhələsində: perspektiv, hədəf və istiqamətlər” mövzusunda dəyirmi masa keçirilmişdir. Tədbirdə Qaradağ Rayon İcra Hakimiyyətinin başçısı cənab Süleyman Mikayılov, Azərbaycan Respublikasının Prezidenti yanında Dövlət İdarəçilik Akademiyasının rektoru, akademik Urxan Ələkbərov, Azərbaycan Respublikasının Prezidenti yanında Dövlət İdarəçilik Akademiyasının Fəlsəfə və Sosial Psixologiya kafedrasının müdiri, professor Tofiq Rəsulov, Azərbaycan Respublikasının Prezidenti yanında Dövlət İdarəçilik Akademiyasının tarix kafedrasının professoru Fuad Məmmədov, Azərbaycan Respublikasının Prezidenti yanında Dövlət İdarəçilik Akademiyasının Dövlət Quruculuğu və Hüquq kafedrasının müdiri, dosent Fəxrəddin Nağıyev, Azərbaycan Respublikasının Prezidenti yanında Dövlət İdarəçilik Akademiyasının Strateji Araşdırmalar mərkəzinin müdir müavini, dosent Elman Nəsirov, Azərbaycan Respublikasının Prezidenti yanında Dövlət İdarəçilik Akademiyasının Həmkarlar komitəsinin sədri, Filologiya elmləri üzrə fəlsəfə doktoru Yusif Ağayev iştirak etmişlər. 
    Tədbirdə geniş fikir mübadiləsi aparılmış, Azərbaycan Respublikasının Prezidenti İlham Əliyev cənablarının sərəncamına əsasən “Azərbaycan 2020: gələcəyə baxış” İnkişaf Konsepsiyasının hazırlanması barədə, son dövrdə ölkəmizdə həyata keçirilən islahatlar bütün sahələrdə müsbət nəticələrin əldə olunmasına şərait yaradılmasından, son onillikdə Azərbaycanda makroiqtisadi sabitlikdən, dinamik iqtisadi artımdan, yoxsulluğun azaldılmasından və əhalinin sosial rifahının yüksəldilməsində ciddi uğurların qazanılmasından danışılmışdır. Çıxış edən natiqlər sərbəst bazar iqtisadiyyatı institutlarının yaradılması və sahibkar təşəbbüskarlığına söykənən iqtisadiyyat modelinin bərqərar olması, iqtisadi və sosial infrastrukturun təkmilləşdirilməsi, çoxşaxəli, səmərəli və innovasiya yönümlü iqtisadiyyatın formalaşdırılması, sosial sahədə önləyici inkişaf trendinin təmin olunması və əhalinin rifahının layiqli, qabaqcıl beynəlxalq standartlara uyğun səviyyəyə çatdırılması, habelə elmin, mədəniyyətin inkişafında, ictimai həyatın bütün istiqamətlərində yeni nailiyyətlərin əldə olunmasından geniş söz açmışlar.